D Gmeind Süderhouz

Gemeinde Süderholz
Verwaltungssitz Poggendorf
Rakower Straße 1
18516 Süderholz
Tel: +49 (38331) 61 0
Fax +49 (38331) 61 125
gemeinde@suederholz.de

D Gmeind Süderhouz esch en Gebietskörperschaft dosse bi de Schwobe, wenn’s gnau wotsch wösse im Kanton Meckleborg-Vorpommern – besch emmer noni zfrede, hä? Denn halt no gnauer: im Landchreis Vorpommern-Rügen. Döt fendsch au das wonderschöni Süderhouz im Südoschte vo dem äbe ageni Landchreis, zwösche Grimmen, de bekannte Universitätsstadt Greifswald ond de Chreisstadt - de alte Hansestadt Stralsund, wo du au die reizvolli Boddenküschte chasch gnüsse. Die Gägend esch landwertschaftlech prägt dör Fälder met Sölle, riesige Grüenlandflächene, vele chlinere Bäch ond schöne Wälder. Üsi Gmeind Süderhouz esch no en Newcomer, das esch Englisch ond bedütet: en ganz jongi Gmeind. Sie esch entstande dör de freiwellig Zämeschloss vo de alte Gmeinde Bartmannshagen, Griebenow, Kandelin, Klevenow, Neuendorf, Poggendorf ond Rakow. Zuesätzlech hät sech au ‘s ehemalige Amt Süderhouz müesse uflöse – ond so esch am 1.1.1999 üsi Gmeind beldet worde. 28 Ortsteil ghöred höt dezue.

 

.

De Setz vo de wechtige Gmeindsverwaltig esch in Poggendorf a ganz zentraler Lag, nämli a de Chrüzig vo de Bondesschtross 194 ond de Landschtross 36. De Name Süderhouz chont vom Waudgebiet südlech vo Poggendorf. Üsi Gmeind esch 149 km² gross ond wird vo 4004 Lüt bewohnt, so vel send’s wenigschtens am 31.12.2012 gse. Das get of en Quadratkilometer öppe 27 Lütli. Mer händ partnerschaftlechi Beziehige zo de Gmeinde Rieseby ond Thumby in Schleswig-Holstein.
 

Dank de Bondesschtross B 194 ond de Landschtross L 26 esch s Gmeindsgebiet verchehrstechnisch guet erschlosse. D’ Autobahn A 20, wo juschtamänt bout werd, hät bi üs grad zwe Abfahrte, in Klevenow ond Griebenow, ond au no de Rügenzuebrenger, d’ B 96n. Die bildet zämme s Autobahndrüegg “Pommerndreieck”. Die neui Autobahn werd secher üsi Infraschtruktur wieter verbessere ond au die vorhandene Gewerbeschtandort för en Asiedlig interessanter mache.

Die gönschtig Lag wird ou de Eigenheimbou fördere. Üsi Gmeind bietet wieters Bouland im B-Plangebiet Neuendorf, aber au Löckebebouig i de andere Ortsteil a. Ond das erscht no zo össerscht gönschtige Prise, so zwösche 5 ond 30 Euro.

No es paar bedütendi infraschtrukturelli Objekt bi üs: s DRK-Chrankehus Grimmen in Bartmannshagen, s Alterspflegeheim ond d Chendertagesschtätt in Griebenow, d Grondschule mit Tornhalle, d Arztpraxis, d Bäckerei ond d Chendertagesschtätt  in Kandelin, d Reintegrationsirechtig för sochtgföhrdeti Mönsche in Schmietkow, d Chendertagesschtätt in Klevenow, d Chendertagesschtätt ond de Bauhof vo de Gmeind in Neuendorf, d Gmeindsverwaltig met em össerscht rege Börgermeischter, s Forschtamt ond d Börgerbegägnigsschtätt in Poggendorf ond lascht böt not liischt s Öbergangs- ond Wohnheim för psychisch chranki Erwachseni in Grischow.


 

Prägt wird üsi Region vonere grossflächige Acher-, Wiese- ond Weidelandschaft. Set de erschte Besiedlige spelt d Landwertschaft e wechtigi Rolle im Läbe vo de bi üs asässige Mönsche. Nach de Wändi esch aber d Zahl vo de Lüt, wo i de Landwertschaft  schaffit, starch zroggange.

I üserem Gmeindsgebiet gets e hufe Chele ond Chäppeli, zwe Schlossalage in Klevenow ond Griebenow ond en onmängi vo wietere zo beougapfelndi Hüser. Sie send onverwächselbari kulturhischtorischi Dänkmöler vo üsere Gägend ond jedes hät so sini eiget Art, sini eigiti Gschecht. Am bekanntischte esch d Schlosschapälle in Griebenow, wo 1648 as föfzähsitige Fachwärkbou bout worde esch. En freischtehende Gloggeschtuel esch of em Chilehof. D Klevenower Schlosschapälle esch as rächteggige Fachhwärkbou met eme Mansardedach im 1730i änegschtellt worde. Im Ennere esch en schöne Chanzlealtar vo 1735. Wieteri Chapelle häts in Poggendorf, Willerswalde, Kaschow – ond net z’vergässe d Chapälleruine in Wüesteney, wo d Süderhouzer Laienschpelgroppe eri Uffüerige hät.
In Gross Bisdorf hets en drüscheffigi Hallechile us de zwöite Hölfti vom 13. Johrhondert. Die Chile esch 1992/93 völlig neu reschtauriert worde. Reschtauriert esch 1996 ou d Orgele worde, wo i de zwöite Hölfti vom 19. Johrhondert vom Fretz Güschtu Mehmel us Stralsund bout worde esch. No vel früener, nämli im 15. Johrhondert, esch d Chele vo Kreuzmanns­hagen as rächteggige Feldschteibou met polygonalem Oschtschloss bout worde. Ond no nes paar Jöhrli vorhär, so zwösche 1232 ond 1288, esch d Rakower Feldschteichile bout worde – das esch wahrschinli di ältischt Chele in üsere Gägend. Die jöngschti Chele esch wou d Bretwischer Chile us em Johr 1852: en rächteggige Feldschteibou met eme vorgsetzte quadratische Weschttorm.
 

Ou noch aluges- ond en Bsuech wärt send d Schlossalage vo Griebenow ond Klevenow. S Griebenower Schloss esch eis vo de bedütendschte vo üsere Gägend – devo hät sech im Johr 2001 ou den Schwizerdütsch-Mondartübersetzer vo dem Text chönne öberzüge. S Schloss esch i de Johre 1702 – 1709 im Uftrag vom C. G. Rehnskiöld bout worde. I dem si Vater esch noch om driesgjöhrige Chrieg för sini Verdienscht as Chammerpräsi vo Schwedisch-Vorpommern met em Guet Griebenow belehnt worde. D Schlossalag schtoht met Huut ond Hoor onder Dänkmolschotz. Im Schlosspark, wo öppe 14 km gross esch ond 1706 zom erschte Mol erwähnt wird, gets en ganz herrleche alte Boumbeschtand. Üses Griebenower Schloss entweklet sech emmer me zomene Kulturzäntrom mit öberregionalem Charakter. Do fendet Konzärt, Usschtellige, Dechterläsige ond vöu anders schtatt.

Klevenow, wo urschprönglech as Borg im Mittualter ufbout worde esch, het met em Herrehus, Park, Waud ond de Näbegüeter öber Johrhunderti eine vo de schönste ond öutischste Familienbsetz vo Pommern gha. S Igangsportal ond d Schlossmure send im 17. Johrhondert bout ond 1997/98 reschtauriert worde. Im 60 Morge grosse Park, wo öppe om 1850 ome agleit worde esch, häts es paar Tömple, de Poggendorfer Trebel ond veli as Naturdänkmöler kännzeichneti Böum.


Witeri Sehenswördigkeite send die vele Grossschteigräber, zu dene mer au Grossdalme seid, im Waldgebiet vo Süderhouz ond de Borgwau, womer nördlech vo de Ortschaft Willershusen fendet. Die öppe acht Meter höchi Ärdufschöttig esch e chli onderhaub vom Ryckgrabe ond esch scho schtarch met Meschwaud verwachse. Typisch für üsi schöni Gägend send au die tolle Boumalleeä, Cheschtene ond Linde, wo die vele Schtrosse sümet. Wel mer en sone chlini Bsedligsdechti händ ond wäg de guete lanschaftleche Bedingige send en Hufe Tierarte z’gseh. So das veli Rot-, Schwarz- ond Rehwöud. Ou veli Zogvögu raschted in üsere Region. Ond d Schtorchnäschter i fast jedem Dorf bewiesed, dass üsi Natur intakt esch.